𝗟𝗲𝗴𝗮𝘀𝗶𝘆𝗮 𝗻𝗴 𝗹𝗶𝗱𝗲𝗿𝗮𝘁𝗼: 𝗔𝗻𝗴 𝗣𝗮𝗴𝘄𝗮𝘄𝗮𝗸𝗮𝘀 𝗻𝗴 𝗣𝗮𝗻𝘂𝗻𝘂𝗻𝗴𝗸𝘂𝗹𝗮𝗻 𝗻𝗶 𝗖𝗲𝗱𝗿𝗶𝗰𝗸 𝗩. 𝗖𝘂𝘀𝗮𝘆 𝗯𝗶𝗹𝗮𝗻𝗴 𝗘𝗱𝗶𝘁𝗼𝗿-𝗶𝗻-𝗖𝗵𝗶𝗲𝗳 𝗻𝗴 𝗧𝗵𝗲 𝗙𝗼𝗿𝘂𝗺 𝗣𝘂𝗯𝗹𝗶𝗰𝗮𝘁𝗶𝗼𝗻

Matapos ang dalawang taong masigasig na dedikasyon sa pagpapaangat ng kalidad ng The Forum Publication, malugod na magpapaalam na sa kanyang tungkulin bilang Editor-in-Chief si Cedrick V. Cusay. Naging isang lider na laging handang buong-pusong ibuhos ang kanyang oras at atensyon para sa ikauunlad ng organisasyon, si Cedrick ay naging inspirasyon at gabay sa kanyang mga kasamahan. Mahigpit ngunit mapagmahal, kinilala siya sa kanyang kakayahang hubugin ang mga miyembro, na nagdulot ng malaking paggalang at pagmamahal mula sa buong organisasyon.

 

Sa loob ng dalawang taon, matagumpay na pinamunuan ni Cedrick ang isa sa mga pinaka-aktibong organisasyon sa Northwestern Visayan Colleges. Sa bawat paligsahan, gawain, at pagpupulong, nagbigay ang publikasyon ng napapanahon at makabuluhang impormasyon. Dahil sa kaniyang husay sa pamamahala, naging maayos at episyente ang paghahatid ng balita ng The Forum Publication sa komunidad ng paaralan. Personal na ginabayan at sinanay ni Cedrick ang mga miyembrong kalahok sa mga paligsahan. Isinulong niya ang patuloy na pag-angat ng kaalaman at kasanayan ng mga miyembro ng organisasyon. Nilinang nito hindi lamang ang kakayahan sa pagsulat, kundi pati na rin ang iba pang mahahalagang kasanayan na kailangan sa pagpapatakbo ng publikasyon, na nagbunga ng isang lubos na maaasahang The Forum Publication.

 

Taos-pusong nagpapasalamat si Cedrick sa mga taong naging bahagi ng kanyang tagumpay, na nagbigay-daan sa kanyang pag-unlad. Pinagpapasalamat niya ang patnubay at suporta nina Gng. Angelie Costudio, kanyang mentor at tagapayo sa The Forum Publication, na nagtiwala sa kanyang kakayahan at patuloy na nagbigay ng gabay; G. Joecel Cuenca, na nagbigay inspirasyon at aral; G. Loyd Fransico, na walang sawang sumusuporta sa publikasyon; at G. Allan Angelo Quimpo, dating pangulo ng Northwestern Colleges, na nagbigay inspirasyon at naniniwala sa kanyang kakayahan. Lubos din ang kanyang pasasalamat kay Jean Torres Gelito, dating Associate Editor-in-chief at kasalukuyang Editor-in-chief, sa kanyang tulong, mga ideya, at pakikipagtulungan sa lahat ng hamon na hinarap ng The Forum Publication. Ang kanilang suporta ang naging susi sa kanyang tagumpay.

 

Hinihikayat ni Cedrick ang bagong pamunuan ng editorial board na maglingkod sa mga mag-aaral nang may dedikasyon, pagmamahal, at pangako sa tungkulin, na yakapin ang bawat oportunidad na darating. Ipinapayo niyang lubos nilang samantalahin ang kaalaman at karanasan na maibibigay ng publikasyon at huwag hayaang mawala ang mga pagkakataon.

 

Sa pamumuno niya hindi lamang niya binuo ang kakayahan ng mga miyembro ng The Forum Publication, kundi inalay niya rin ang kanyang karanasan upang gabayan ang susunod na henerasyon ng mga lider sa loob ng organisasyon, na nag-iiwan ng pamana ng husay at dedikasyon na magpapatuloy na magbigay-inspirasyon sa mga susunod pang taon.

✍🏻: Quessy Lozada, Junior Staff Writer 

🖼️: Khyn Akizah Namanama, Layout Artist